Ana dili tədbirləri İran hakimiyyətini təşvişə salıb
Fevralın 21-i Beynəlxalq Ana Dili günü kimi qeyd olunacaq. Güney Azərbaycandakı Tələbə Hərəkatı bütün türk toplumuna müraciət edərək həmin gün keçiriləcək tədbirlərdə iştirak etməyə çağırıb. Hərəkatın güney şəhərləri boyunca yaydığı bildiriş vərəqələrində Azərbaycan türkcəsinin İranda ikinci dövlət dili elan olunması tələbilə aksiya keçiriləcəyi bəyan olunub. Tələbələr bildiriblər ki, milyonlarla Azərbaycan türkünün yaşadığı bir ölkədə türk dilinin işlənməsinə qadağa qoyulması yolverilməzdir və İran irticasının bu siyasətinə son verilməlidir.
Bu xəbərdarlığın yayılmasından dərhal sonra Cənubi Azərbaycanda elan olunmamış hərbi vəziyyətin tətbiqinə başlanılıb. Güneydəki mənbələrdən daxil olan məlumata görə, rəsmi Tehran Cənubi Azərbaycanın iri şəhərlərinə əlavə polis və hərbi qüvvələr yerləşdirib. Küçə və meydanlarda nəzarət xeyli gücləndirilib. Güney Azərbaycanda milli fəallara qarşı təzyiqlərin daha da şiddətləndiyi barədə “Media forum” saytı da xəbər yayıb. Saytın məlumatına görə, fevralın 14-də ETTELAAT-ın Əhər şəhər şöbəsi 100-ə yaxın tanınmış milli fəalın evinə zəng edərək onları ETTELAAT-a çağırıb. Qurumun yerli şöbəsində milli fəallara bildiriblər ki, heç kəs fevralın 16-dan sonra Əhərdən Təbrizə və ya Ərdəbilə gedə bilməz. Milli fəallardan ana dili günü evdə oturacaqları barədə yazılı izahat alınıb. Məlumatda o da bildirilir ki, izahat yazmaqdan imtina edən bir qrup fəal, o cümlədən Saleh Molla Abbasi həbs edilib. Tutulanların taleyi ilə bağlı hələlik məlumat yoxdur.

müsavat

Fevralın 21-də qeyd olunacaq Beynəlxalq Ana Dili Günü yaxınlaşdıqca Güney Azərbaycanda milli fəalların həbsi də vüsət alır. Güneydəki mənbələrdən «Media forum» saytına verilən xəbərə görə, fevralın 18-də ETTELAAT əməkdaşları Təbrizin tanınmış milli-siyasi fəallarından biri olan Həsən Ərkin Saib küçəsində yerləşən mağazasına müraciət edərək onu və qohumlarından birini tutub naməlum istiqamətə aparıblar. Onların nə üçün və harada saxlanıldığı bəlli deyil.

Beynəlxalq Ana Dili günü ərəfəsində Güney Azərbaycanda milli fəallara qarşı təzyiqlər artmaqdadır. Güney Azərbaycandakı mənbələrdən «Media forum»a verilən məlumata görə, fevralın 14-də ETTELAAT-ın Əhər şəhər şöbəsi 100-ə yaxın tanınmış milli fəalın evinə zəng edərək onları ETTELAAT-a çağırıb.

ETELLAAT-ın yerli şöbəsində milli fəallara bildiriblər ki, heç kəs fevralın 16-dan sonra Əhərdən Təbrizə və ya Ərdəbilə gedə bilməz. Milli fəallardan fevralın 21-də, Beynəlxalq Ana Dili günündə evdə oturacaqları və ana dili günü keçiriləcək tədbirlərdə iştirak etməyəcəkləri barədə yazılı izahat alınıb.

Məlumatda o da bildirilir ki, izahat yazmaqdan imtina edən bir qrup fəal, o cümlədən Saleh Molla Abbasi həbs ediliblər. Tutulanların taleyi ilə bağlı hələlik heç bir məlumat yoxdur.

mediaforum

Bu gün Güney Azərbaycanın Miyanə şəhərinin cümə imamı Hamidi naməlum şəxs tərəfindən bıçaqlanıb. Hamidi aldığı yaralar nəticəsində dünyasını dəyişib. Qatilin kim olduğu və cinayəti hansı məqsədlə törətdiyi hələlik bilinmir.

Qeyd edək ki, hər bir şəhərdə fəaliyyət göstərən cümə imamı həm də İranın dini rəhbəri ayətullah Əli Xamneyinin rəsmi nümayəndəsi sayılır. Cümə imamını Xamneyi özü təyin edir. Cümə imamı cümə günləri namaz təşkil edir və şəhərdəki bütün mollaların böyüyü sayılır.

Fevralın 12-də Güney Azərbaycanın Şəbistər şəhərində tələbə hərəkatının fəallarından olan Behnam Nurməhəmmədi həbs edilib.

Güney Azərbaycan mənbələrindən «Media forum»a verilən məlumata görə, dünən ETTELAAT-ın Şəbistər şəhər bölməsinin məmurları B. Nurməhəmmədinin atası evinə basqın ediblər və heç bir izahat vermədən milli fəalı tutaraq naməlum istiqamətə aparıblar. Urmiya Texniki Universitetinin tələbəsi olan B.Nurməhəmmədinin hazırda harada saxlanıldığı məlum deyil.

Güneyli mənbələrin məlumatına görə, fevralın 4-də Şəbistər şəhərində beynəlxalq ana dili günü münasibəti ilə yazılı vərəqələr yayarkən milli fəallar - Behzad Xorşidzadə, Pərviz Sultani və Qəhrəman Sultani ETTELAAT məmurları tərəfindən həbs ediliblər. Hadisənin üstündən 9 gün keçməsinə baxmayaraq, milli fəallar hələ də ETTELAAT-ın Şəbistar şəhər bölməsində saxlanılırlar.

Qeyd edək ki, milli fəallara qarşı hər hansısa ittihamların irəli sürülüb-sürülmədiyi barədə hələlik məlumat yoxdur.

Fevralın 8-də Təbrizin 40 min azarkeş tutan futbol stadionunda Təbrizin «Traktorsazi» futbol klubu ilə Tehranın «Atiyesazəni kövsər» klubu arasında qarşılaşma olub. Təbriz klubu Tehran komandasına qalib gəlib. Matç başa çatandan sonra ağzınacan dolu standionda azarkeşlər ayağa qalxaraq «Yaşasın Azərbaycan!» şüarını səsləndirməyə başlayıblar. Stadiondan çıxıb Təbrizin küçələri ilə irəliləyən minlərlə futbol azarkeşi milli şüarlar səsləndirməkdə davam edib və faktiki olaraq Təbrizin küçələrində yürüş keçirilib.
Güney Azərbaycandakı mənbələrdən «Media forum» saytına verilən məlumata görə, yürüşün genişlənməsindən qorxan hüquq-mühafizə orqanlarının əməkdaşları dərhal işə qarışaraq azarkeşləri dağıtmağa və vəziyyəti nəzarət altına almağa çalışıblar. Təbrizin Abresani və Vəliəsr küçələrində yürüşçülərlə polis arasında qarşıdurma yaşanıb. Az bir zamanda 300-dən çox polis maşını yürüşçülərin irəlilədiyi bütün istiqamətlərdə küçələri mühasirəyə alıb. Günorta saatlarında Təbrizdə yaranmış bu gərginlik axşam saatlarınadək davam edib.

Nümayişçilərdən tutulanların olub-olmadığı hələlik məlum deyil.

Güney Azərbaycana rəsmi Tehranın basqıları artıq adi hala dönüb, dünya ictimaiyyəti buna layiqincə qiymət vermir. Güney Azərbaycan Milli Hərəkatına Dəstək Komitəsinin üzvü Tofiq Seyid bu sözləri bu gün Beynəlxalq Mətbuat Mərkəzində keçirdiyi mətbuat konfransında söyləyib. Daha sonra ölkə mətbuatını da Güney hadisələrinə soyuq yanaşmada tənqid edən T.Seyid bütün ictimai-siyasi qurumları bu biganəliyə son qoymağa çağırıb. Milli təhqirə cavab olaraq keçən il mayın 22-də Güney Azərbaycan türklərinin hərəkata başladıqlarını xatırladan T.Seyid, rəsmi Tehranın çabalarına baxmayaraq bu hərəkatı ifnormasiya blokadasında saxlamağa müvəffəq olmadığını bildirib.

Fevralın 4-də Ankarada «İran Azərbaycanının qadınları» adlı sərgi açılıb. Mərasim Türkiyədə təhsil alan güneyli tələbələrlə İranın bu ölkədəki səfiri Baqiri və İslami Şura Məclisindəki təbrizli deputat İşrət Şaiq arasında qızğın mübahisəylə yadda qalıb. «Media forum» saytının əldə etdiyi məlumata görə, tələbələr səfirə və deputata Güney Azərbaycan siyasi məhbuslarının hüquqlarının pozulması ilə bağlı etiraz ediblər.

Tələbələr 2006-cı ilin may-iyun aylarında azərbaycanlıların etiraz aksiyalarında minlərlə nümayişçinin tutulmasını və onlarla günahsız insanın qətlə yetirilməsini, habelə Ərdəbil zindanında saxlanılan Abbas Lisaninin acınacaqlı vəziyyətini xatırladaraq İ.Şaiqi deputat kimi bütün bunlara göz yummaqda günahlandırıblar. İ.Şaiq verdiyi izahla hamını heyrətə salıb və hiddətləndirib: «Karikatura məsələsi ilə bağlı Təbrizdə keçirilən etiraz nümayişlərində mən özüm də olmuşam. Nümayişçilərin sayı bir neçə yüz nəfəriydi. Orada başqa heç nə baş verməyib. Sizin internet saytlarında gördüyünüz şəkillər saxtadır. Bu şəkillər sizləri aldadıb!»

 Güney Azərbaycan xalqı UNPO-ya qəbul edildi

Dünən Güney Azərbaycan Milli Azadlıq Hərəkatı İranın Bakıdakı səfirliyi qarşısında etiraz aksiyası keçirib.

Güneyli fəal, hazırda həbsdə olan Abbas Lisaninin və digər məhbusların azadlığa buraxılması tələbi ilə keçirilən aksiyada «Lisani Lisani yolun davam edəcək!», «Faşist İran həya et, Lisanini Azad et», «Lisani – Abbasi yolun davam edəcək!», «Lisaniyə azadlıq !», «Olum olsun fars şovinizminə!», «Azərbaycan oyaqdır, varlığına dayaqdır!» şüarları səsləndirilib.